basically, peace maar

banda:

meri zindagi naraaz hai.
jabki sab isi ke kaaj hain

kabhi kehti hai kaho,
kabhi ye ki chup raho

kabhi bole ki chup kyu ho,
kabhi ye ki bas.. kyu ho

kabhi ye ke tu hai kaun,
kabhi puche bata main kaun.


zindagi:

keh pau agar chup ho,
sunne ko zara ruk to

ke main kavita hu tere man ki
aur tu syahi bhi kalam bhi

ke tujhpar hasi bhi aati hai
kabhi gussa aur sharam bhi

main kapde hu tere tan pe,
main dhabbe hu tere man ke

main joote tere pairon ke,
main vaade hu gairon ke

main parchhai main shehnai,
main naiyya main purvai

ab bas itni si hai arzi
ke anjaan bedardi

kadwahat hai to ho lazzat bhi,
ke badnaami ho, to izzat bhi

ke kab se saath hu tere main,
kab se kaaj hu kare main

kabse jeeta hai mujhko
kabse peeta hai mujhko

ke ghaav bhi deta hai
fir khud hi seeta hai mujhko

aa maan bhi ja ke roothe der ho chali
kahin roshni aag mein ekdum na jal bujhe

jal mand mand apne man ki chaal mein
samajhna kya hai, bas jeeta chal mujhe